Дар Коллеҷи омӯзгории Донишгоҳи давлатии Хуҷанд ба номи академик Бобоҷон Ғафуров 24-уми майи соли 2023 олимпиадаи ҷумҳуриявии донишҷӯёни муассисаҳои таҳсилоти миёнаи касбӣ аз рӯйи фанҳои ҷамъиятӣ – гуманитарӣ баргузор гардид, ки дар он муовини вазири маориф ва илми Ҷумҳурии Тоҷикистон Лутфия Абдухолиқзода, кормандони раёсати таҳсилоти ибтидоӣ ва миёнаи касбӣ, омӯзгорон ва донишҷӯён иштирок доштанд.
Лутфия Абдухолиқзода, чорабиниро ифтитоҳ бахшида, изҳор намуд, ки мақсад аз амали сохтани тамоми иқдомот дар самти рушди илму маориф, махсусан, ташкили озмунҳо ва олимпиадаҳои ҷумҳуриявӣ барои баланд бардоштани сатҳи саводнокиву маърифатнокии насли наврасу ҷавон, беҳтар гардонидани сатҳу сифати таълим ва тарбияи кадрҳои ба талаботи замон ҷавобгӯй мебошад.
Боиси зикр аст, ки дар олимпиада 55 нафар донишҷӯ аз 15 муассисаи таҳсилоти миёнаи касбӣ аз рӯйи 4 фан: забон ва адабиёти тоҷик, забон ва адабиёти рус, забони англисӣ ва таърих иштирок намуданд.
Ифтихормандона бояд қайд кард, ки аз Коллеҷи омӯзгории ба номи Хосият Махсумоваи ДДОТ ба номи Садриддин Айнӣ дар ин сабқати бонуфуз 4 нафар донишҷӯ ширкат варзида, Қаюмова Ҷаҳоноро аз фанни таърих сазовори ҷойи аввал, Назарова Зебуннисо аз фанни забони англисӣ шоистаи ҷойи аввал, Қаландарзода Манижа аз фанни забон ва адабиёти тоҷик сазовори ҷойи дуюм ва Юнусова Соро аз фанни забон ва адабиёти рус шоистаи ҷойи сеюм гардиданд. Дар маҷмуъ, Коллеҷи омӯзгорӣ дар миёни 15 коллеҷ сазовори ҷойи аввал шуда, бо диплом ва туҳфаҳои хотиравӣ қадрдонӣ гардиданд. Ҳамзамон , директори муассиса Ғафурӣ Зоир Саъдулло барои сазовори ҷойи аввал гардидан дар миёни 15 муассисаи таҳсилоти миёнаи касбӣ бо Ифтихорномаи Вазорати маориф ва илми Ҷумҳурии Тоҷикистон сарфароз гардонида шуд.
Ин дастоварди беназир барои раёсат, омӯзгорон ва муҳассилини Коллеҷ муборак бод!
